Mela Umntanakho Ngo 2008
U2008 uqale ngokwenyuka kwenhlawulo yemali yesikolo okwedluliseyo. Zithe zivalwa nyakenye izikolo bekulababalisi abathize,ingwalo zokubala phose bezingekho njalo inengi lezifundi zihlale phansi emakhaya ngoba zingenelisi inhlawulo zesikolo ebezisenyuka njalonje. Lonyaka akulabungcono ilizwe lifahlakele lanxa ulemali yakho kawufinyeleli ukuyithola,uthi lanxa usuyiphethe ofuna ukukuthenga kunzima ukutholakala. Akukho okusijabulisayo empilweni njalo kumbalwa okungasenza sibobotheke, kodwa abantwana sivame ukubathola bebobotheka njalo behleka bajabula nje ngoba bayazi ukuthi kulomuntu obathandayo njalo ozabanakekela. Inengi labazali liyazinikela kanzima ukuze abantwababo bafunde. Kwamanye amazwe kulicala ukungahambisi umntanakho esikolo abazali abehluleka ukwenza lokho bazithola besentolongweni, kodwa eZimbabwe umumo ubenza bengenelisi ukupha ilungelo elimqoka lemfundo kubantwababo.
Uhulumende wethu,onguhulumende ‘wabazali’ lalaba abazithi bangabalweli benkululeko, bayazi kamhlophe ukuthi impi yaliwa kulezithembiso, esinye ‘ESEMFUNDO YAMAHALA KUZENGA LEMFUNDO YAPHANSI’. Igazi lachitheka ukuze lesisithembiso sifezeke. Kulokuthi sikholise izithelo zempi yenkululeko, sibone nyakenye inhlawulo yezikolo isenyuka ngenkulungwane ekhulwini (1000%), lonyaka siqala futhi ngokwenyukiswa kwenhlawulo zesikolo ngezigidi lezigidi zamadola. Uhulumende uthi kasenelisi ukukhangela indleko zesikolo kanye lokuhlawula iholo lababalisi kumele inhlawulo ikhokhwe ngabazali. Kanti ilizwe alisela mali na? Nxa kunjalo kungani kulemali yokuhlawula (amapholisa agqoke ezabo) amaCIO ukuze benze ingqe yini, kuziphathamandla zikahulumende zona kasikhulumi bahamba ngamanzi ezimota ezinhle okwamagama? Kanti eyabo imali yokwenza santando bayithola ngaphi njalo kungani limali le ingaphiwa isikhwama sezemfundo ukuze isithembiso semfundo yamahala yezenga laphansi sigcwaliseke?
Izenga lemfundo yethu kayisanakekelwa iyekelwa ibhidlika nje bengagqize qhakala njalo ikusasa yabantwabethu isibengumnikelo kukhuselwa abafuna amandla ezombangazwe sikhuluma ngequla elilenkohlakalo, elingela zwelo,amasela ezinakekela wona kuphela. Singaqhubeka sithule sisekela betshontsha ikusasa yabantwabethu na?
Kungaba yinto enhle na? Ukuthi abazali baqhubeke besekela ngamavoti abezombangazwe abatshontshe ithemba lamaphupho abantwabethu? Inengi labantwabethu seliziphilisa ngendlela ezingalunganga ezinjengokutshontsha lokuthengisa imzimba yabo njalo inengi labo lidela amakhaya liyekhatshana kwamanye amazwe baze bafe bebodwa bengela zihlobo labangane.
Kuliphupho lomzali wonke ukuthi abantwabakhe babe lekusasa enhle – ukuthi bazakhula kuhle beqinile,bejabula,bandise umdeni wakwabo baphumelele empilweni bamondle laye nxa esekhokhoba. Ngesikhathi sempi yenkululeko sathenjiswa imfundo yamahala kuzenga laphansi ngoba sasifuna ukuthi ilizwe lonke libe ngelifundileyo. Ngakhoke ukwekela izenga lemfundo libhidlike kulicala – kuze kube nini sidubeka ngokona kukahulumende lo? Batshontsha ikusasa yethu okufana xathu lokutshontsha impilo zethu.
Manje sekuyisikhathi sokuthi sibophe ziqine simele ikusasa yabantwabethu lekusasa yethu
Asikhumbuleni amazwi ahlakaniphileyo abokhokho bethu – ikhotha eyikhothayo – ngakhoke mondle angakhula uzakondla lawe.
Amanye amazwi ahlakaniphileyo athi intandela yobulembu obunengi buyasibopha nko isilo sesilwane. Asifundeni inhlakanipho kubokhokho bethu – nxa singamanyana singabuyisa ikusasa yabantwabethu endleleni eqondileyo.
IWOZA iyalimema ukuthi lihlanganele lathi ekumeleni ikusasa yabantwabethu.